Mè fôt travalyér sur cen que mè balye lo plus d’enrage ou m’empache adrêt de mè sentre ben dedens la via. Les reprôches a mémo-sè sont ben sûr cen que les plus ensuportâbles. Yo musâvo que reussévo a m’emparar de lor, mas dèrriérement en su muens sûr.

‘L at brâvament de situacions, yô mè sento pas ben una râva. Des viâjos en clâssa quand sé pas més cen que fôt fére ou yô sont les fotôcopies. Fôt dére qu’èprôvo de tot fére en mémo temps et que mè simpllifio pas la via. J’é des idês de cen que fôdrêt fére et èprovo a fére tot, en particuliér tandiu les aleçons d’alemand. ‘L est ja pas simpllo de tot fére, mas se en mémo temps remarco que les ècoliérs fant pas cen que dévrant fére, ou s’en fotont coment de l’an quaranta, 1) vent oncor més complicâ por mè de fére cen que vuel fére et 2) mè sento crouyét et mèchient. En plache d’ègzigiér de travâly, su sovent a mè dére : « ‘L ant-il pas rêson de s’empacientar ? ‘L est pas tant entèrèssent que cen. Et pués sè compte-t-il de todrêt fére ceti ègzèrcice ? » A la fin de la conta te sâs pas més cen que fôt dècidar. Fôt-il tot arrètar ? Fôt-il demandâ de sè concentrar ? Vat-il sèrvir ?

Ensècuritât, dôtances. Culpabilitât : « J’arê-yo falu fére ôtro ? ».

Por contrar tot cen j’é dècidâ de pas més fére certênes chouses. Premiérement, de bon matin quand sur dèsomnâ (dèssongiê) et que li cèrvél a mè ‘l est prèsto et ‘l at envie de veriér a cent a l'hora, mè dio : « Nan, Jaque. Lèsse fére. Te vâs pas planifiar les aleçons u liét. Mémo se t’avésses des bons idês. Te porrês pas t’ensovenir de cen que te les marques pas, adonc lèsse pèrdre. »

Ceti an j’é muens d’ècouliérs que m’obcèdont. Quand sonjo a une classa ‘l est plutot en visualisent les ècouliérs que sont entèrèssês d’aprendre. ‘L est una chance ; d’ense pouè quasi mè rejouyir de tenir l’ècoula…

Un’ôtra chousa ‘l est de mè rèlaxar lo cochon (la noca), adonc lo dèrrriér de la téta que ‘l est sovent tendu, pas tranquilo una bréca. Faso sovent les ègzèrcices de visualisacion d’un ècheliator (‘escalier roulant’) que vèso bas et yô visualiso les numèros de 9 tant que 1 chôd un, a la doce, en mémo temps que rèspiro. Féso asse ben lo scanêr que parte du son(jon) de la téta por arrevar a chavon des artelyos en fasent des sôrtes de lèches (‘trenches’) de scanâjo rèlaxent.

É l’impréssion que cen ‘l est nècèssèro por gouardar l’envie d’ensègnér. Ôtrament pouè pas gouardar prod de distance encontro la pèrèssa [pir.i:ja] des ècouliérs, la lor crôya fê, lo lor manco de sèriox et de prêsa de rèsponsabilitât. Sê prod que celos que ‘l ant pas la bôna atituda a l’ècoula vant pas en profitiér ; aprensont (apregnont) pas et a la fin de la conta l’ignorance serat li lor trista rècompensa. Pouè pas fére bêre quârqu’un que ‘l at pas sêf. Pouè justo dére : « Motêla, vê l’hèrba ! ». Mas se s’entèrèsse ux ébôdes a cél moment-lé, pouè ren fére que dére ‘damâjo por tè’. Mas t’âs lo drêt de pas crêtre coment sonjo yo que sarêt bon por tè. « A la grâce de Diô ». M’arêt fét plèsir d’édiér tè, mas se t’âs pas d’entèrèt a tè fére édiér, tant pire por tè.